- Диданд: 26
НАҚШАИ ПИЛЛАИ СОЛИ 2026 ИҶРО ГАРДИД!
Рушди соҳаи кишоварзӣ яке аз самтҳои муҳимми таъмини амнияти ғизоӣ ва иқтисодиву иҷтимоии кишвар ба ҳисоб меравад. Заҳмати содиқонаи деҳқонону кишоварзон баҳри иҷрои нақшаву дурнамо ва таъмини аҳолӣ бо маҳсулоти кишоварзӣ ва корхонаҳо бо ашёи хом самараи нек дода истодааст.
Боиси ифтихору сарфарозист, ки кишоварзони ноҳияи Рӯдакӣ назар ба дигар ноҳияҳои тобеи ҷумҳурӣ аввалин шуда, нақшаи истеҳсоли пилларо дар соли 2026 сарбаландона иҷро намуданд. Ин дастоварди назаррас туҳфаи арзанда ба истиқболи ҷашни 35-солагии Истиқлоли давлатии Ҷумҳурии Тоҷикистон буда, аз сатҳи баланди масъулиятшиносӣ ва меҳнатдӯстии пиллапарварони ноҳия дарак медиҳад.
Тибқи маълумоти раёсати кишоварзии ноҳияи Рӯдакӣ нақшаи истеҳсоли пилла барои соли 2026 дар асоси қарори раиси ноҳия муҳтарам Нусратулло Салимзода тасдиқ гардида, ҳаҷми он 6500 килограмм муайян шуда буд. Бо шарофати тадбирҳои саривақтӣ, ташкили дурусти кор ва заҳмати шабонарӯзии пиллапарварон иҷроиши нақша дар ин марҳила ба 7116 килограмм ё 109 фоиз расонида шуд. Айни замон истеҳсоли пилла дар хоҷагиҳо бомаром идома дошта, кишоварзон ният доранд, ки ҳаҷми иловагии маҳсулотро низ таъмин намоянд.
Роҳбарияти ҷамъияти саҳҳомии кушоди “Пиллаи тоҷик” дар ҳамкорӣ бо мақомоти иҷроияи ҳокимияти давлатии ноҳияи Рӯдакӣ ҷиҳати татбиқи дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва татбиқи сиёсати созандаи давлат дар самти рушди пиллапарварӣ корҳои назаррасро ба анҷом расониданд. Бо роҳбарии бевоситаи раиси ноҳияи Рӯдакӣ Нусратулло Салимзода ситоди махсус оид ба тақсими тухми кирмак, таъмини шароити мусоид ва ҷамъоварии пилла таъсис дода шуда, фаъолияти он дар ҳамоҳангӣ бо сохторҳои соҳавӣ, ҷамоатҳои шаҳраку деҳот ва хоҷагиҳои кишоварзӣ ба роҳ монда шуд.
Тибқи банди 2 қарори Ҳукумати Ҷумҳурии Тоҷикистон аз 1 июни соли 2023, №247 “Дар бораи андешидани тадбирҳо ҷиҳати рушди соҳаи пиллапарварӣ”, барои густариши ин соҳаи муҳим тадбирҳои мушаххас роҳандозӣ гардидаанд. Натиҷаи ҳамин таваҷҷуҳу дастгирӣ буд, ки абрешимчиёни ноҳияи Рӯдакӣ имсол аз ҳар 250 қуттии кирмак ба ҳисоби миёна 28,5 килограммӣ пилла истеҳсол намуда, зиёда аз 7,1 тонна маҳсулоти хушсифат ба даст оварданд.
Бояд гуфт, ки пиллапарварӣ аз ҷумлаи самтҳои асосии соҳаи кишоварзӣ маҳсуб ёфта, дар рушди саноати сабук ва истеҳсоли маҳсулоти содиротӣ нақши муассир дорад. Маҳсулоти пилла ҳамчун ашёи хоми гаронарзиш дар истеҳсоли риштаҳои абрешимӣ, матоъҳои миллӣ, атласу адрас ва дигар маҳсулоти саноатӣ истифода мешавад. Ҳамзамон, абрешим дар саноати сабук, тиб, косметология ва ҳатто, дар баъзе самтҳои истеҳсоли маҳсулоти хӯрокворӣ мавриди истифода қарор дорад.
Таърихи пиллапарварӣ дар сарзамини тоҷикон бисёр қадима буда, мардуми мо аз давраҳои пеш бо парвариши кирмаки абрешим машғул буданд.
Бо истифода аз фурсат ба ҳамаи пиллапарварон, роҳбарони хоҷагиҳо, фаъолон ва сокинони меҳнатқарини ноҳияи Рӯдакӣ барои саҳми арзандаашон дар иҷрои нақшаи истеҳсоли пилла изҳори сипосу миннатдорӣ менамоям. Итминони комил дорем, ки кирмакпарварони ноҳия то анҷоми мавсим имкониятҳои мавҷударо самаранок истифода бурда, ҳаҷми истеҳсоли пиллаи хушсифатро боз ҳам афзоиш медиҳанд.
Муваффақияти имрӯзаи пиллапарварони ноҳияи Рӯдакӣ далели равшани он аст, ки ҳар ҷо меҳнати софдилона ва ташкили дурусти кор вуҷуд дошта бошад, натиҷаи дилхоҳ ҳатман ба даст меояд.
Аҳлиддин ШАРИФЗОДА, муовини якуми раиси ноҳияи Рӯдакӣ
- Диданд: 51
Рӯз, 23-юми апрели соли 2026 дар ноҳияи Рӯдакӣ семинари минтақавии илмию амалӣ таҳти унвони «Тартиби амалисозии чорабиниҳои ветеринарӣ дар хоҷагиҳои гӯсфандпарварӣ» баргузор гардид.
Чорабинии мазкур бо ташаббуси Академияи илмҳои кишоварзии Тоҷикистон ва Институти тибби ветеринарӣ дар доираи нақшаи баргузории конференсияю семинарҳои илмию амалии минтақавӣ, рӯзҳои саҳроӣ, фермерӣ ва мизи мудаввар роҳандозӣ шуд. Дар саминар директори Институти тибби ветеринарии Академия, номзади илмҳои ветеринарӣ Раҷабмурод Атовуллозода бо маъруза баромад намуда, аҳаммияти татбиқи дастовардҳои илмиро дар рушди соҳаи чорводорӣ махсус таъкид кард.
Дар қисмати илмии чорабинӣ як қатор масъалаҳои муҳимми соҳа мавриди баррасӣ қарор гирифтанд. Аз ҷумла, ходими илмии шуъбаи биотехнологияи маводди ветеринарӣ ва татбиқи дастовардҳои илмӣ Муллоҷон Амирбеков оид ба гузаронидани нақша-чорабиниҳои зиддиэпизоотӣ дар хоҷагиҳои гӯсфандпарварӣ маъруза намуд. Ҳамзамон, ходими калони озмоишгоҳи вирусология Самандар Қосимов доир ба таъсири тағйирёбии иқлим ба пайдоиши бемориҳои сироятии чорвои хурди кишоварзӣ ибрози назар кард.
Зикр гардид, ки омилҳои иқлимӣ метавонанд ба паҳншавии бемориҳо таъсири ҷиддӣ расонанд ва талаб менамояд, ки чораҳои пешгирикунанда тақвият дода шаванд. Дар идома мудири шуъбаи паразитология Сулаймон Сатторов масъалаи гузаронидани чорабиниҳои зиддигелминтӣ (зиддигиҷавӣ)-ро дар байни чорвои хурд шарҳ дода, роҳҳои самараноки мубориза бо паразитҳоро пешниҳод намуд.
Дар анҷоми семинар миёни иштирокчиён муҳокимаи озод баргузор гардида, пешниҳодҳо ҷиҳати беҳтар намудани хизматрасониҳои ветеринарӣ ва баланд бардоштани маҳсулнокии соҳаи гӯсфандпарварӣ ироа шуданд.
- Диданд: 86
Рӯз, 6-уми апрели соли 2026 муовини якуми раиси ноҳияи Рӯдакӣ Шарифзода Аҳлиддин ба Ҷамоати деҳоти шаҳраки Мирзо Турсунзода, деҳаи Румӣ, хоҷагии деҳқонии "Махсум- 2014" сафари корӣ намуда, аз рафти кишти пунбадона, ки бо усули зери пилёнка роҳандозӣ шудааст, шинос гардид. Дар саргаҳи замини хоҷагӣ муовини якуми раиси ноҳия бо роҳбарони хоҷагиҳои кишоварзии пахтакор оид ба бартариятҳои ин усул суҳбат карда, таъкид намуд, ки истифодаи таҷрибаҳои пешрафта, аз ҷумла кишти пахта дар зери плёнка якчанд бартарият дошта, барои гирифтани ҳосили фаровон ва баландсифат замина мегузорад. Ин усул хароҷоти истеҳсолиро кам карда, ба афзоиши ҳосилнокӣ мусоидат менамояд ва минбаъд зина ба зина гузаштан ба ин усулро дар дигар хоҷагиҳои пахтакор, ҳатмӣ шуморид. Ба маълумоти Раёсати кишоварзӣ кишти пунбадона дар ноҳияи Рӯдакӣ тибқи дурнамо имсол 350 гектар ба нақша гирифта шудааст, ки айни замон 21 гектар кишти пунбадона гузаронида шудааст ва ин раванд бомаром идома дорад. Бо истифода аз боду ҳавои мусоид кишоварзон кӯшиш ба харҷ дода истодаанд, ки дастуру супоришҳои Асосгузори сулҳу ваҳдати миллиро сармашқи кори худ қарор дода вобаста ба тағйирёбии иқлим кишти инноватсионии зари плёнкаро ба роҳ монанд ва бо масъулияти баланду заҳмати содиқона кишти баҳориро сари вақт ва бо сифати баланд анҷом дода, барои ба даст овардани ҳосили фаровон тамоми неруи худро сафарбар намоянд. Гуфта шуд, ки татбиқи таҷрибаҳои пешқадам, ҷорӣ намудани технологияҳои инноватсионӣ ва истифодаи оқилонаи захираҳо метавонад барои рушди устувори соҳаи кишоварзӣ ва таъмини амнияти озуқавории кишвар заминаи мусоид фароҳам оварад.
Саҳифаи 1 аз 3
1USD
1EUR
1RUB